Open login
«Мәликәниң» мухлислири тола
12.05.2018 13:03   

 

«Уйғур авази» гезити, 4 май 2018 ж.

Талғир наһийәсиниң Қизил Ғәйрәт йезисидики «Мәликә» уссул ансамблиниң қурулғиниға бари-йоқи үч жил болди. Мошу аз вақит ичидә униң наһийәдә аммибаплиғи шу қәдәр өстики, һәрқандақ мәрасим уларсиз өтмәйду десәк, һәргизму ашурувәткәнлик әмәс.

Һәқиқәтәнму кичигидин сәнъәтхумар Мәликә Ниязованиң тәшәббуси билән қурулған бу ансамбль пәқәт мәдәний чарә-тәдбирләргә қатнишипла қалмай, җай-җайларда өткүзүлүватқан байқаш-көрүкләрниң паал иштракчиси. Ансамбль әйнә шу конкурсларда дайим алдинқи орунлардин көрүнүп, тамашибинларниң алқишиға еришиватиду. Мәсилән, улар йеқиндила Алмута шәһиридә өткән «Нурлы жастар» җумһурийәтлик конкурсқа қатнишип, хореография, миллий уссул вә заманивий уссул номинациялири бойичә үч биринчи, икки иккинчи вә бир үчинчи орунни йеңивалди. Уларниң бу хошаллиғини бөлүшкәч, ансамбль паалийити тоғрилиқ униң рәһбири Мәликә Һашимҗан қизи билән учрашқан едуқ:

– Растимни ейтсам, узундин буян арман қилип қурған «Мәликә» ансамблиниң аз вақит ичидә мундақ утуқларға йетиду дәп ойлимиған едим, – деди сөһбәтдишимиз хошаллиқ илкидә. – Мәктәптә оқуп жүргән чағлиримда анда-санда уссул бойичә чоң-кичик чарә-тәдбирләргә қатнишаттим. Кейинирәк Абай намидики Қазақ педагогика университетиға чүшкинимдиму уссулға болған иштияқим бесилғини йоқ. Шу түпәйли вақит тапсамла, Уйғур театриға берип, сәнъәтниң бу түриниң қир-сирини маһир уссулчи Дилбәр һәдә Пәхирдиновадин тәпсилий үгәндим. Пурсәттин пайдилинип, шу устазимға чәксиз миннәтдарлиғимни билдүримән.

Әнди ансамбль паалийитигә тохталсам, бизниң дәсләпки қәдимимиз «Күншуақ» җумһурийәтлик конкурсидин башланди. Ойлимиған йәрдин қизлирим І орунни йеңивелип, бирқатар Пәхрий ярлиқлар билән тәғдирләнди. Бу бизгә роһий илһам бәрдидә, техиму җиддий ишләшкә кириштуқ. Нәтиҗидә бизни һәрхил мәрасимларға тәклип қилғучилар көпийип, махтинип қояй, абройимиз хелила өсти.

Шуни алаһидә тәкитләш лазимки, мән мошу Қизил Ғәйрәт йезисиниң турғуни болғанлиқтин, бу ансамбльниң хәйрихаһлиқ паалийәт биләнму шуғуллинидиғанлиғидин хәвәрдармән. Мәсилән, өткән жили Норуз мәйрими һарписида жуттики Мәдәнийәт өйидә Мәликә Ниязова мәрһум атисиниң хатирисигә чоң концерт уюштуруп, униңдин чүшкән пулни маддий җәһәттин ярдәмгә муһтаҗ инсанларға тарқитип бәрди. Илаһим, аримизда мошундақ сахавәтлик, бирәвниң ғеми билән яшайдиғанлар сани көпәйсун!

Өз новитидә, «Мәликә» ансамблиниң паалийитигә утуқ-муваппәқийәтләр тиләймиз.

Қасимҗан ЧОРУҚОВ.

Талғир наһийәси. http://uyguravazi.kazgazeta.kz/?p=34410

 
Интересный материал? Поделись с другими:

Добавить комментарий


Защитный код
Обновить